रायपुर | 27 अक्टूबर 2026
छत्तीसगढ़ मं धान बेचे के तैयारी करत किसान मन बर सरकार ह खरीफ विपणन बरस 2026-27 के धान खरीदी के तारीख तय कर दिस हे। प्रदेश मं 15 नवंबर 2026 ले समर्थन मूल्य मं धान खरीदी शुरू होही। सरकार के मुताबिक, 27.50 लाख ले जादा किसान मन ले ₹3100 प्रति क्विंटल के दर ले धान खरीदे जाही। एकड़ के हिसाब ले अधिकतम 21 क्विंटल धान खरीदी के सीमा रखे गे हे।
ए दफा किसान मन ला टोकन कटवाय बर समिति के चक्कर कम लगाना पड़ही। ‘तुंहर टोकन’ मोबाइल ऐप के माध्यम ले किसान मन घर बइठे ऑनलाइन टोकन ले सकहीं। सरकार ह खरीदी व्यवस्था ला आसान बनाए बर नवा खरीदी केंद्र, बायोमेट्रिक सत्यापन अउ अवैध धान के आवक रोके बर निगरानी व्यवस्था घलो बढ़ाय के तैयारी करे हे।
3100 खरीदी केंद्र मं बिकही धान
सरकारी जानकारी के मुताबिक, ए साल प्रदेश मं 360 नवा धान खरीदी केंद्र शुरू करे जावत हे। एखर बाद कुल 3100 उपार्जन केंद्र मं किसान मन अपन धान बेच सकहीं।
खरीदी केंद्र मं किसान मन के सुविधा बर जरूरी इंतजाम करे के निर्देश दे गे हे। धान भरे बर नवा अउ पुराना जूट बारदाना के पर्याप्त व्यवस्था करे के बात घलो कही गे हे।
धान खरीदी मं वास्तविक किसान मन के पहचान सुनिश्चित करे बर बायोमेट्रिक सत्यापन के व्यवस्था लागू रही। एखर संग डिजिटल क्रॉप सर्वे के माध्यम ले धान के रकबा ऑनलाइन तय करे जाही।
एग्रीस्टैक आईडी वाले किसान मन ला अलग पंजीयन के जरूरत नइ
सरकार ह किसान मन के सुविधा बर फैसला करे हे कि एग्रीस्टैक आईडी वाले पिछला साल के पंजीकृत किसान मन ला धान बेचे बर फेर ले अलग पंजीयन कराय के जरूरत नइ पड़ही।
एग्रीस्टैक मं पंजीयन होय के कारण किसान मन ला धान बेचे बर समिति मं अलग ले ऋण पुस्तिका जमा करे के जरूरत घलो नइ होही।
‘तुंहर टोकन’ ऐप ले 24 घंटा मिलही ऑनलाइन टोकन
धान बेचे बर टोकन लेय के प्रक्रिया ला आसान बनाए खातिर खाद्य विभाग ह ‘तुंहर टोकन’ मोबाइल ऐप के उपयोग करही। सरकारी जानकारी के मुताबिक, ऐप गूगल प्ले स्टोर मं उपलब्ध हे। किसान मन ओटीपी के माध्यम ले पंजीयन करके 24 घंटा ऑनलाइन टोकन ले सकहीं।
हर समिति के रोजाना खरीदी सीमा मं ले 70 फीसदी टोकन ऐप के माध्यम ले जारी होही, जबकि बाकी 30 फीसदी टोकन समिति स्तर ले दिए जाहीं।
ऐप के माध्यम ले जारी होय वाले टोकन मं 80 फीसदी हिस्सा लघु अउ सीमांत किसान मन बर, जबकि 20 फीसदी हिस्सा बड़े किसान मन बर तय करे गे हे।
रकबा के हिसाब ले मिलही टोकन
– 2 एकड़ तक के किसान: एक टोकन
– 2 एकड़ ले जादा अउ 10 एकड़ तक: दू टोकन
– 10 एकड़ ले जादा रकबा: तीन टोकन
ए व्यवस्था ले किसान मन ला टोकन बर समिति मं लंबा लाइन लगाए के परेशानी कम होय के उम्मीद हे।
अवैध धान के आवक रोकै बर 273 चेकपोस्ट
धान खरीदी के समय सीमावर्ती राज्य मन ले अवैध धान लाए अउ खरीदी मं गड़बड़ी के आशंका ला रोकै बर सरकार ह निगरानी बढ़ाय के फैसला करे हे।
एखर बर जिला स्तर मं विशेष जांच दल बनाए के निर्देश दिए गे हें। प्रदेश मं 273 चेकपोस्ट अउ 131 सीमावर्ती खरीदी केंद्र चिन्हांकित करे गे हें।
धान खरीदी से जुड़ी शिकायत मन के निराकरण बर समय-सीमा घलो तय करे गे हे। अति संवेदनशील केंद्र के शिकायत 24 घंटा मं, संवेदनशील केंद्र के शिकायत 48 घंटा मं अउ सामान्य केंद्र के शिकायत 72 घंटा के भीतर निपटाए के निर्देश हें।
क्यूआर कोड अउ लोकेशन ट्रैकिंग ले होही निगरानी
धान खरीदी अउ परिवहन मं पारदर्शिता लाए बर चावल के बोरी मं क्यूआर कोड आधारित स्कैनिंग अउ ट्रेसिबिलिटी लागू करे जाही। एखर ले बोरी के परिवहन के निगरानी करे जा सकही अउ चावल के पुनर्चक्रण मं रोक लगाए मं मदद मिलही।
धान के उठाव करे वाले वाहन मं लोकेशन ट्रैकिंग डिवाइस लगाए के निर्देश घलो दिए गे हें। एखर ले धान कहां ले कहां तक जावत हे, ए बात के वास्तविक समय मं निगरानी करे जा सकही।
केंद्रीय पूल बर 73 लाख मीट्रिक टन चाउर के लक्ष्य
भारत सरकार के खाद्य विभाग ह खरीफ विपणन बरस 2026-27 बर छत्तीसगढ़ ले केंद्रीय पूल मं 73 लाख मीट्रिक टन चाउर लेय के लक्ष्य तय करे हे।
राज्य सरकार के कहना हे कि ऑनलाइन टोकन, बायोमेट्रिक सत्यापन, डिजिटल क्रॉप सर्वे अउ निगरानी व्यवस्था के माध्यम ले धान खरीदी ला किसान-केंद्रित अउ पारदर्शी बनाए के कोशिश करे जावत हे।
किसान मन बर जरूरी बात: धान बेचे के तैयारी करत किसान मन अपन पंजीयन, एग्रीस्टैक आईडी, रकबा अउ टोकन संबंधी जानकारी के जांच समय रहिथे कर लेवं। खरीदी केंद्र मं धान ले जाए के तारीख अउ टोकन के नियम के जानकारी अपन समिति ले जरूर लेवं।
